អត្ថបទ៖ ប៊ុត សារុន
កំពង់ស្ពឺ៖ លោក គឹម មាសសុខសីហា អនុរដ្ឋលេខាធិការក្រសួង​ពាណិជ្ជកម្ម និងជាអនុប្រធានគណៈកម្មការរៀបចំ​ការបោះឆ្នោត​សភា​ពាណិជ្ជកម្ម​​កម្ពុជារាជធានី-ខេត្ត សម្រាប់អាណត្តិថ្មីនិងអាណត្តិបន្ត បានថ្លែងលើកទឹកចិត្ត ដល់តំណាងសេដ្ឋកិច្ចក្រៅប្រព័ន្ធនានាក្នុងខេត្តកំពង់ស្ពឺឱ្យចូលរួមក្នុងជីវភាពជាសមាជិកជ្រើសតាំងនៃសភាពាណិជ្ជកម្មខេត្តកំពង់ស្ពឺ។

ការថ្លែងលើកទឹកចិត្តនេះរបស់លោក គឹម មាសសុខសីហា បានធ្វើឡើងនាឱកាសរៀបចំបើកការិយាល័យចុះឈ្មោះ និងចាប់លេខរៀងសម្រាប់បោះឆ្នោត ជ្រើសរើសសមាជិកជ្រើសតាំងសភាពាណិជ្ជកម្មខេត្តកំពង់ស្ពឺ អាណត្តិទី៣ លើកទី១ ដែលប្រពឹ្រត្តទៅនៅមន្ទីរពាណិជ្ជកម្មខេត្តកំពង់ស្ពឺថ្ងៃទី២៣ ខែមីនា ឆ្នាំ២០២៣ ដែលរៀបចំដោយនាយកដ្ឋានអភិវឌ្ឍន៍វិស័យឯកជន នៃអគ្គនាយកដ្ឋានពាណិជ្ជកម្មក្នុងប្រទេស នៃក្រសួងពាណិជ្ជកម្ម សហការជាមួយមន្ទីរពាណិជ្ជកម្មខេត្តកំពង់ស្ពឺ។

លោកអនុរដ្ឋលេខាធិការ បានធ្វើការណែនាំពីលក្ខខណ្ឌដល់ពាណិជ្ជករ អាជីវករ​ សេវាករនៅក្នុងខេត្តកំពង់ស្ពឺ ដែលមានបំណងចុះឈ្មោះ ឈរជាសមាជិកជ្រើសតាំង និងចុះឈ្មោះបោះឆ្នោតសភាពាណិជ្ជកម្មខេត្តកំពង់ស្ពឺ សម្រាប់អាណត្តិទី៣ លើកទី១និងវិធីសាស្ត្រនៃការឃោសនារកការគាំទ្រ។

ជាមួយនឹង​នោះដែរ លោក គឹម មាសសុខសីហា ​បានបញ្ជាក់បន្ថែមថា មានពាក្យ៥មាត់ដែលបេក្ខជនឈរឈ្មោះត្រូវធ្វើនិងមិនត្រូវធ្វើពេលឃោសនារកសំឡេងឆ្នោតគាំទ្រ ក្នុងនោះគឺ៤កុំនិងមួយធ្វើ។៤កុំគឺកុំដើម្បីតែប្រជាប្រិយភាពខ្លួនឯងបន្តុះបង្អាប់ធ្វើឱ្យប៉ះពាល់ដល់ សេចក្តីថ្លៃថ្នូរអ្នកដទៃ កុំឃោសនាហែរជាក្បួន កុំចែកឯកសារនៅថ្ងៃបោះឆ្នោត និងកុំបោះឆ្នោតស្ទាបស្ទង់ជាសាធារណៈ។ ចំណែកមួយធ្វើគឺត្រូវធ្វើឱ្យបានតាមប្រតិទិន ដែលគណៈកម្មាធិការរៀបចំការបោះឆ្នោតបានអនុម័តថ្ងៃបោះឆ្នោតគឺសុំឱ្យអ្នកគាំទ្រមកបោះឆ្នោត បានគ្រប់ៗគ្នានិងទាន់ពេលវេលា។

ទន្ទឹមនឹងនោះលោកអនុរដ្ឋលេខាធិការ បានស្នើឱ្យពាណិជ្ជករ អាជីវករសេវាករចូលរួមឱ្យបានផុសផុល នៅក្នុងការចូលរួមចុះឈ្មោះបោះឆ្នោត ក្នុងអាណត្តិទី៣ លើកទី១ ដើម្បីឱ្យការបោះឆ្នោតប្រកបទៅដោយរលូន និងទទួលបានបេក្ខជនដែលមានសមត្ថភាពសម្រាប់បន្តអាណត្តិការងាររបស់សភាពាណិជ្ជកម្ម ក៏ដូចជាចូលរួមនៅក្នុងអភិវឌ្ឍន៍សេដ្ឋកិច្ចជាតិ៕